జమ్మూ కశ్మీర్‌లోని బద్గాం జిల్లాలో ఈరోజు (శుక్రవారం) ఇద్దరు ఉత్తరప్రదేశ్ వలసకార్మికులు ఉగ్రవాదుల కాల్పులకు గురయ్యారు. మజహామా ప్రాంతంలో జల్ జీవన్ ప్రాజెక్టుపై పనిచేస్తున్న సుఫియాన్, ఉస్మాన్ అనే ఈ వలసకార్మికులు గాయపడ్డారు. ప్రస్తుత పరిస్థితి స్థిరంగా ఉందని అధికారులు పేర్కొన్నారు. ఈ ఘటన అనంతరం, బాధితులను హాస్పిటల్‌కు తరలించారు. ప్రస్తుత సమాచారం ప్రకారం వారు తక్షణ చికిత్స పొందుతూ నిలకడగా ఉన్నారు.
ఇటీవలి నెలల్లో కేంద్ర పాలిత ప్రాంతంలో చోటు చేసుకుంటున్న వరుస ఉగ్రదాడుల్లో ఇది తాజా ఘటన. ఇటీవలే పాకిస్తాన్ మద్దతు పొందిన జైష్-ఏ-మహ్మద్ ఉగ్రవాదులు జమ్మూ కశ్మీర్‌లోని అఖ్నూర్ ప్రాంతంలో భారత సైనిక కాన్వాయ్‌పై దాడి చేసిన సంగతి తెలిసిందే. ఈ క్రమంలో భద్రతా బలగాలు ముగ్గురు ఉగ్రవాదులను హతమార్చారు. ఇంటెలిజెన్స్ వర్గాల సమాచారం ప్రకారం, ఈ ఉగ్రవాదులు అఖ్నూర్ మార్గంలో ప్రవేశించి ప్రధాన దాడికి సిద్ధమయ్యారు. బటాల్ ప్రాంతం నుంచి ప్రవేశించిన ఈ ఉగ్రవాదులు లష్కరే తోయిబా వంటి నిషేధిత సంస్థలకు చెందిన వారు.
అక్టోబర్ 24న బారాముల్లాలో ఉగ్రవాదులు సైనిక వాహనంపై దాడి చేసి, ఇద్దరు సైనికులు, ఇద్దరు పౌర కార్మికులను హతమార్చిన విషయం తెలిసిందే. ఈ దాడుల నేపథ్యంలో భద్రతా బలగాలు ఉగ్రవాద నిరోధక చర్యలను మరింత బలోపేతం చేశాయి.
