విజయవాడ సమీపంలో ఒక మహిళ రన్నింగ్ ట్రైన్‌ నుండి కాలువలోకి దూకిన ఘటన స్థానికులను మరియు అధికారులను ఆందోళనకు గురిచేసింది. ఈ సంఘటన విజయవాడ పూల మార్కెట్ సమీపంలో జరిగింది. జిన్నతున్నీసా అనే మహిళ, బాపట్ల జిల్లా భట్టిప్రోలు ప్రాంతానికి చెందినది. కొన్ని సంవత్సరాలుగా ఆమె మానసిక సమస్యలతో బాధపడుతుండగా, అవసరమైన మందులు తీసుకోలేకపోవడం వల్ల ఆమె అనేక సందర్భాల్లో కుటుంబ సభ్యులకు చెప్పకుండా ఇంటి నుండి వెళ్లిపోయేదని తెలుస్తోంది.
శనివారం సాయంత్రం ఆమె విజయవాడ వైపు వెళ్లే రైలులో ఎక్కి ప్రయాణిస్తున్న సమయంలో, రాత్రి 11 గంటల సమయంలో పూల మార్కెట్ దగ్గర ఉన్న బందరు కాలువలోకి రైలు నుండి అమాంతం దూకేశారు. 10 గంటలపాటు ఆమె చెట్టు కొమ్మ పట్టుకుని నిలిచారు. తెల్లవారినప్పుడు స్థానికులు ఆమెను గమనించి పోలీసులకు సమాచారం అందించారు. వెంటనే కృష్ణలంక పోలీసులు అక్కడికి చేరుకుని ఆమెను రక్షించి, స్వల్ప గాయాలతో ఆసుపత్రికి తరలించారు.
ఈ ఘటన స్థానికులను ఆందోళనకు గురిచేసింది. ఆమె కుటుంబ సభ్యులకు పోలీసులు సమాచారం అందించగా, ఆమె గతంలో కూడా ఇటువంటి చర్యలకు పాల్పడినట్లు వారు చెప్పారు.
